သင် ငယ်ငယ်တုန်းက ရွှေသွေး ဂျာနယ် တွေနဲ့ ဝယ်ဖတ်ဖူးပါသလား ?
ကျနော် မမွေးခင်က ထုတ်ဝေသော ရွှေသွေး ပေါင်းချုပ် ကို အိမ်နီးနားချင်းအိမ် အလည်သွားဆော့ပါက ဖတ်သည်နှင့် ကျနော် ငယ်ငယ်တုန်းက ဖတ်သည့် ရွှေသွေး … ဖတ်ရသည့် အရသာ မတူပေ။
ခေတ်ဟောင်း က ရွှေသွေး က အရသာ ပိုလေး ပါသည်။
ဒါပေမယ့်လည်း အဘိုး ဆီက ရသည့် မုန့်ဖိုး တစ်နေ့ တစ်ကျပ် ကို စုပြီး တစ်ပတ် တစ်ကြိမ် ရွှေသွေး ကို ငါးကျပ် ပေးဝယ်ဖတ်ပါသည်။
ကျန်သည့် နှစ်ကျပ် မှသာ အချို့ရက် မုန့်ဝယ်စား ၊ ကျောက်တံ ဝယ်ရပါသည်။
စာဖတ် ဝါသနာ ပါသလို စုဆောင်း ရတာလည်း ဝါသနာ ပါလှပါသည်။
ရွှေသွေး ကနေ တေဇ ၊ မိုးသောက်ပန်း ၊ ပလုတ်တုတ် ၊ ရတနာပန်းခင်း ၊ Top English ၊ သုတစွယ်စုံ။
ထိုမှ စာရေးဆရာများ၏ တစ်အုပ်စာပေများ ဖတ်ပြီးသည်အခါမှာတော့ တစ်အုပ်ချင်း စာအုပ်တွေပဲ ဝယ်ဖတ်ဖြစ်တော့တယ်။
ကျနော် ငယ်ငယ်က စုဆောင်းထားသည့် ကလေးဖတ်စာပေတွေသည် ကျနော့် အသက်အရွယ် အရ ပြန်ဖတ်ဖို့ရန်လည်း မရှိ၊ ရောင်းစားဖို့ကလည်း စိတ်ကူးမရှိဖြင့် သိမ်းဆည်းထားခဲ့တာ ကြာပါပြီ။
Facebook မှ အလကားပေးမည် Group ထဲ ဝင်ပြီးသည်နောက်တွင် နယ်မှ စာကြည့်တိုက်လေး တစ်ခု နှင့် ရန်ကုန်မှ လက်ဘက်ရည်ဆိုင်ရှိ ကလေးတွေကို ပညာဒါန စာအုပ်ငှါးပေးနေသည့် အဖွဲ့ တစ်ခု သို့ စာအုပ်တွေ ခွဲပြီး လှူဒါန်းခဲ့ပါသည်။
ယနေ့တွင် Facebook တွင် ဆရာ အော်ပီကျယ် (apk Cartoonist) Share ထားတော့ Status ဖတ်မိခဲ့ပါသည်။ အောက်ပါအတိုင်း ဖြစ်ပါသည်။
ရွှေသွေးဂျာနယ် အမှတ်( ၁ ) အတွဲ ( ၁ ) ကို သီချင်းတွေဆိုတဲ့ ကိုတိုနီကျော်ဒင်က သူ့သမီးပင်ကီတို့ကို အဖွားဖြစ်သူက (၄၅)နှစ်ကြာ စုဆောင်းမှုဖြစ်တဲ့ ရွှေသွေးဂျာနယ် တွေကို မြေးတွေဖတ်ဖို့ထုတ်ပေးပါပြီ လို့တွေ့တာနဲ့ ကျွန်တော်ဖုန်းဆက်ပြီး ချက်ခြင်းသွားပါတယ်၊ အံ့သြဖွယ်စုဆောင်းမှုပါ ရွှေသွေးဂျာနယ် ဆိုက်သေး အားလုံးတစ်စောင်မကျန် အကောင်းအတိုင်းရှိနေပါတယ်၊ အင်မတန် ကျေးဇူးတင်မိပါတယ်၊ ကျွန်တော့်မှာ စီးရီးလိုက်အစုံမရှိပါ။ ဆရာဦးစိန် ရဲ့ကာတွန်းတွေမှာဆိုရင်လည်း လူငယ်တို့ရဲ့သဘာဝ စွန့်စားခန်း လေးတွေက အမြဲလိုလိုပါဝင်လေ့ရှိပြီး၊ ကာတွန်းကို ဖတ်ပြီးတာနဲ့ Education ကရပြီးသားဆိုတာ တွေ့နေရတာပါပဲ၊
ရွှေသွေး အမှတ်(၁) အတွဲ (၁) ကစပြီး ပါဝင်ခဲ့တဲ့ ဦးဟယ်ရီအောင်ရဲ့ မြစ်ကြီးဧရာဝတီ အခန်းဆက် ဆိုရင်လည်း ဧရာဝတီ ဒေါက်ခယူမင်ထရီ ဆိုရင် သူ့ကို မကျော်နိုင်ကြသေးဖူးပဲ ပြောရလိမ့်မယ်။
ကာတွန်း ဆရာဦးဖေသိန်းကလည်း မြန်မာ့စောင်း၊ နှဲ၊ ပတ္တလား၊ တိုးနယားကစလို့ သိမှတ်ဖွယ်ရာများကို အပတ်စဉ် ပုံပြရှင်းလင်းချက်တွေ က အပတ်စဉ် အသိဥာဏ်ပညာတွေ တိုးစေခဲ့တာ မြင်ကြရမှာပါ။
ဒါ ကလေးတွေအတွက် Scan ကူးပြီးပေးရတော့မယ်လို့နားလည်ပါတယ်။ ပတမဆုံးအတွဲ တစ်နှစ်စာယူလာခဲ့ပါတယ်၊ တစ်စောင်ခြင်း Scan ကူးရပါမယ်။ Pdf လုပ်ရပါမယ်၊ ပြီးရင် အနည်းဆုံးတစ်ပါတ်ကိုတစ်စောင်တော့ရအောင် လုပ်ပေးပါမယ်၊ ပြီးရင် Green Tree ဆိုတဲ့ Page လေးတစ်ခုဖန်တီးပြီး ထည့်ထားပေးပါမယ်။
Green Tree ဆိုတဲ့အမည်က နောက်လူအတွက်၊ နောက်မျိုးဆက်အတွက် ဆိုတဲ့ စကားကို လူတစ်ယောက်စီကနေ ကျွန်တော်ခနခနကြားရတဲ့ အမည်ပါ။ ဦးသန်းအောင် လို့ခေါ်ပါတယ်၊ ပညာရေးဝန်ကြီးလုပ်ခဲ့ဖူးပြီး အခုဆုံးပါးသွား ခဲ့ပါပြီ၊ ကျွန်တော့်သူငယ်ချင်း ဝေအောင်နဲ့ ဝင့်အောင်တို့ရဲ့ ဖခင်ပါ၊ မန္တလေးတိုင်းသမဝါယမ အသင်းစုမှုးဘဝက ပန်းရိုးမဆိုတဲ့ ပြက္ခဒိန်နဲ့ဒိုင်ယာရီကို ထုတ်ဝေခဲ့တဲ့သူပါ၊ သူ့ကြောင့် မန္တလေးကမြန်မာခေတ်ပေါ်ပန်းချီဆရာများဖြစ်တဲ့ ဘဏ်ခင်မောင်၊ ဦးအောင်ခင်၊ ဦးအောင်ချမ်း၊ ပေါ်ဦးသက်၊ ဦးတင်အေး၊
ဦးကျော်လေး၊ ဦးဇော်ဝင်း(သစ်ထွင်း) တို့ရဲ့ ပန်းချီကားတွေများစွာကျန်ရစ်ပြီး ပုံနှိပ်မှတ်တမ်းများစွာကို အားလုံးမြင်တွေ့ခွင့်ရကြတာပါ။ ဝင့်အောင်ရဲ့ဖခင်ဟာ ပညာရေးဝန်ကြီးမှန်းစောစောက မသိခဲ့ပါ၊ ပညာရေးဝန်ကြီးအဖြစ် နဝတ အစိုးရအဖွဲ့ မှ ရပ်စဲခြင်းခံရပြီးမှ ပညာရေးဝန်ကြီး ဆိုတာကောင်းကောင်းသိပါတော့တယ်၊ house arrest တစ်နှစ် နေထိုင်ရတဲ့
ကာလမှာ ကျွန်တော် သူတို့အိမ်ကို ခနခနရောက်ပါတယ်၊ ကျွန်တော်ရောက်ပြီး ဝင့်အောင်တို့နဲပြောစရာတွေပြောပြီးချိန်လောက်မှာ ထွက်ထွက်လာပြီး ကျွန်တော်နဲ့ နာရီများစွာ စကားပြောလေ့ရှိပါတယ်၊ ပထမဆုံးသူ့ဆီကကြားရတဲ့ စကားက ကျွန်တော် House Arrest နဲ့ နေရတဲ့ တစ်နှစ်တာကာလမှာ စိတ်အခြေအနေကောင်းပါတယ်၊ ၁၉၆၀ခုနှစ်ကတည်းက ညအိပ်ယာဝင်ရင် စာအုပ်တစ်အုပ်ဖတ်ပြီးမှ အိပ်တာကနေ အခုဝန်ကြီးဘဝကနားခွင့်ရတဲ့အချိန်မှာ နောက်တစ်အုပ်တိုး ဖတ်နိုင်ချိန်ရလို့ တစ်ည စာ(၂ ) အုပ်ဖတ်ရပြီးအိပ်ခွင့် ရတဲ့အတွက် ပိုပြီးမြတ်တယ်လို့တောင်ပြောချင်ပါတယ်တဲ့။ညကသတင်းတွေ့ လိုက်တယ်ဗျ၊ ထိုင်းဝန်ကြီးချုပ် သက်ဆင် က သူ့ကလေးတွေ ကို ထိုင်းတစ်နိုင်ငံလုံးက မူလတန်းကစပြီး Lap Top ကွန်ပြူတာတစ်လုံးစီပေးမယ်တဲ့အဲဒါဗျာ ကျွန်တော့်ကလေးတွေနဲ့ နောင် ( ၅ ) နှစ်ကြာရင် ကွာသွားတော့မယ်၊ဒုက္ခပါပဲလို့ သိတ်ပူပန်နေပါတယ်၊ ဘယ့်နှယ် ဒီပညာရေးဝန်ကြီးဟောင်းက အငြိမ်းစားပေးခံရတာကို အာလျက မပြတ်နိုင်ရှာပဲ မြန်မာကလေးတွေ နောက်ကျတော့မယ်လို့ ပူပန်နေသေးတယ်ပေါ့၊ အမှန်တော့ သူ့စိတ်ကူးထဲမှာ နောက်မျိုးဆက်အတွက် အမြဲပဲပူပန်နေခဲ့တဲ့သူပဲ၊ သူပညာရေးဝန်ကြီးဘဝက စိတ်ကူးပြင်ဆင်ခဲ့ပြီးအငြိမ်းစားပေးခံလိုက်ရလို့ လုပ်မပေးခဲ့လိုက်ရတဲ့ ကိစ္စတွေထဲမှာ တွံတေးသိန်းတန်နဲ့ ဒေါ်မာမာအေး ကို ရန်ကုန်တက္ကသိုလ်ကနေ ဂုဏ်ထူးဆောင်ဘီအေဘွဲ့ ချီးမြှင့်ပေးမလို့ပြင်ထားတာ မပေးခဲ့နိုင်တာကို တသသပြောရှာပါတယ်၊အဲဒါ ဦးသန်းအောင်ပါ။
တစ်နေ့ကျွန်တော့်ကို Logo လေးတစ်ခုအပ်ပါတယ်၊ GREEN TREE တဲ့။ သူတို့မိသားစုက စိုက်ပျိုးရေးထုတ်ကုန်လေးတွေထုတ်လုပ်ဖို့ပါ၊ ပြီးတော့ ပန်းချီကားတွေစိတ်ဝင်စားတဲ့ဒီဇိုင်းဆရာနဲ့ တွေ့ တော့ ငါလည်း ပန်းရိုးမပြက္ခဒိန် ပစ္စလက္ခဖြစ်နေတာ ပြန်လုပ်ကြသေးတာပေါ့ကွာဆိုပြီး ကျွန်တော်နဲ့ ပြက္ခဒိန် (၂)စောင်လုပ်ဖြစ်ပါတယ်၊ နောက်မျိုးဆက်တွေအတွက် သူ့ဖက်က ဘာလုပ်ပေး ရမလည်း အသင့်ရှိပါတယ်၊ သူ့သားများနဲ့သားတွေရဲ့သူငယ်ချင်းဖြစ်သူ ကျွန်တော်တို့ကို ဒီလိုကိစ္စမျိုး တစ်ခုခုလုပ်ဖို့ တွေ့တိုင်း တိုက်တွန်းပါတယ်။ ဒီလိုဆရာဦးဘကြည်ရဲ့ ရွှေသွေး၊ တေဇ၊ တို့ကျောင်းသား၊ မိုးသောက်ပန်းတို့ကို ကောင်းနိုးရာရာလေးများကို ပြန်လည်ထုတ်ဝေဖို့ သူတာဝန်ယူမယ် ကျွန်တော်က ထုတ်ဝေဖို့လုပ်ပေးပါလို့ သဘောတူပြီးကာမှ အသည်း အစားထိုးကုသမှု အတွက် စင်္ကာပူဆေးရုံမှာ အော်ပရေးရှင်းအောင်မြင်ပြီးမှ အသည်းအသစ်က အလုပ်လုပ်တဲ့နှုန်းကို အဆုတ်အဟောင်းက လိုက်အလုပ်မလုပ်နိုင်ပဲ သေဆုံး သွားခဲ့ပါတယ်။ ဆေးကုအသွား ဖခင်နဲ့ အတူထိုင်လိုက်သွားတဲ့ သူငယ်ချင်း ဝင့်အောင် က အပြန်မှာ ဖခင်အလောင်း ကို လေယဉ်ဝမ်းထဲကနေ ပြန်သယ်လာခဲ့ရလို့ မင်းအဆင်ပြေရဲ့လားလို့ အမေးမှာ ခံစားရပေမယ့် အဖေနဲ့ ကျွန်တော်တို့စိတ်ဖြောင့်စွာ နှုတ်ဆက်နိုင်ခဲ့လို့ ဖြေဆည်နိုင်ပါကြောင်း ပြောပါတယ်။
ဝေအောင် နဲ့ ဝင့်အောင် က ဆေးရုံကုတင်ပေါ် က ဖခင်ဦးသန်းအောင်ရဲ့ နောက်ဆုံး အချိန်မှာ ( အဖေ မိသားစုကို စိတ်ချပြီးသွားပါ၊ အဖေ မိသားစု ကို တာဝန်ကျေခဲ့ပြီး ကျွန်တော်တို့ က အဖေသင်ကြားထားတဲ့အတိုင်း ဘဝ ခရီးကို ရိုးသားမှုနဲ့ပဲ ခရီးဆက်မှာဖြစ်လို့ စိတ်ချပြီး ဘဝကူးခရီးကိုဖြောင့်တန်းနိုင်ပါကြောင်း) နှုတ်ဆက်တဲ့အခါ အန်ကယ် ဦးသန်းအောင် က သူ့သားဝေအောင်နဲ့ ဝင့်အောင် ကို ကြည့်ပြီး အေး မင့်တို့ကို ငါ စိတ်ချပါတယ် လို့ပြောပြီး ဆေးရုံ ကုတင်ပေါ်မှာမျက်လုံးမှိတ်ပြီးခေါင်းအစောင်းမှာပဲ ဘဝတစ်ပါးသို့ ကူးပြောင်း သွားကြောင်း ပြောပြတဲ့အတွက် အန်ကယ် ဦးသန်းအောင်ရဲ့ သေခြင်း ကို အားကျရပါတယ်။
အခုလည်း အန်ကယ်ဦးသန်းအောင်နဲ့ ပြောဆိုပြီး မလုပ်လိုက်နိုင်တဲ့အစီအစဉ် တွေထဲကအကြောင်းအရာမျိုးဖြစ်တဲ့အတွက် သူစိတ်ကူးခဲ့တဲ့ GREEN TREE ဆိုတဲ့ သူ့ခေါင်းစဉ်လေး အောက်ကနေ ကျွန်တော်ကြိုးစားပြီး ကောင်းနိုးရာရာ လေးတွေကိုကြိုးစားပြီး ထည့်သွင်းထားပေးပါ့မယ်၊ ဒါကို ကူညီချင်တဲ့သူနဲ့ မျှဝေချင်တဲ့သူများရှိရင်လည်း ကူညီပြီးထည့်သွင်းမျှဝေနိုင်ပါကြောင်းနဲ့ ဒီညမှာပဲ GREEN TREE PAGE လေးဖွင့်ပြီး ရွှေသွေးဂျာနယ် အမှတ်(၁) အတွဲ (၁) ကစပြီး အစဉ်လိုက်ထည့်သွင်းပေးထားပါမယ့်အကြောင်း။
ဒီဇိုင်း မျိုးဆွေသန်း
၃း၀၀ နာရီ
၂၃၊ စက်တင်ဘာ၊ ၂၀၁၄။
နိဒါန်းတွေ စာကိုယ်တွေ အရမ်းများသွားရင် ခွင့်လွတ်ပါ။
အောက်က လင့် ကို နှိပ်ပြီး အရသာ မြည်စမ်းကြည့်လိုက်ပါဗျာ။
Facebook Page: GREEN TREE
No comments:
Post a Comment